قانماق ایسته مز باشا کئچه ن باشی بوْش میللته قان قوسدورور، آشکارلیقدان دم وورور، دانیشانی سوسدورور. کؤهنه لری اوچوروب، سؤزدن عمارت قورور، اوْ، میللتین دردینی بیر آن قانماق ایسته مز. بیر تمه لسیز محرابا عؤمرو بویو باش قوْیان، ائشیتدییی هر تزه فیکره، سؤزه قوش قوْیان، قیرخ ایل بوندان ازلکی شعارلارلا یاشایان کؤهنه یوْلو، وردیشی، بو […]
قانماق ایسته مز
باشا کئچه ن باشی بوْش میللته قان قوسدورور،
آشکارلیقدان دم وورور، دانیشانی سوسدورور.
کؤهنه لری اوچوروب، سؤزدن عمارت قورور،
اوْ، میللتین دردینی بیر آن قانماق ایسته مز.
بیر تمه لسیز محرابا عؤمرو بویو باش قوْیان،
ائشیتدییی هر تزه فیکره، سؤزه قوش قوْیان،
قیرخ ایل بوندان ازلکی شعارلارلا یاشایان
کؤهنه یوْلو، وردیشی، بو گون دانماق ایسته مز.
جهالتی چوخ اولور ساوادلی جاهللرین،
اونلار خبرسیزدیلر طلبیندن ایللرین.
جهالت گیردابیندا یوخولاری چوخ درین،
جهالت یوخوسوندان هئچ اویانماق ایسته مز.
وظیفه پالتارینی گییه ن کیمی اینینه،
میللت اوز اوسته دوشسون، گلمز اونون عئینینه،
وطن، میللت قایغیسی باتماز اونون بئینینه،
رتبه سیاهیسیندن قارالانماق ایسته مز.
آغاسینین یانیندا حؤرمت قازانماق اوچون
میللتینین باشیندا قوْز سیندیریر اوْ، بو گون.
آرخاسینی کناردا تاپان بو بیج تونبه تون
میللتین کؤلگه سینه دالدالانماق ایسته مز.
آبریمیزی قوْرویوب بیز گوناهکار اولموشوق،
گؤزلری کوْر، دیلی لال، قولاغی کار اولموشوق.
بیر زامانلار آخی بیز، أر اوغلو أر اولموشوق.
یادداش اؤز دونه نینی نییه آنماق ایسته مز؟
دردینین شدَتیندن اوْیوم – اوْیوم اوْیولان،
هر ایشده حاقلی ایکن، هر ایشده حاقسیز اولان،
یوردوندان، یوواسیندان ایلیم – ایلیم قوْوولان
قارداشینین دردینه قارداش یانماق ایسته مز.
بئش آددیم ایره لینی گؤرموروک، دومانداییق،
دنیزده ییک، بیلمیریک، هارا گئدیر بو قاییق.
همیشه گومانداییق، ائله بیر زامانداییق،
قانان گؤرمه ک ایسته مز، گؤرن قانماق ایسته مز.
( بختیار وهابزاده)
کاغیزلاشان آغاجلار
اوزولدو گؤیلردن آغاجین الی،
کاغیز اولماق اوچون دوشدو تورپاغا.
مئشه ایلاهه سی، مئشه گؤزلی
گئتدی قلملره قوربان اولماغا.
اونا قهمر دورماق، ال توتماق چتین
باهاریم ائله بیل پاییزا دؤندو.
قانیم ائله قاچدی، سیریم – صفتیم
آغ آپ آغ آغاریب کاغیزا دؤندو
آغاج دؤنمه لییدی دوم آغ وااغا،
ائه، اونون قدرینی کیم بیله جکدیر؟
گؤیلره باش چکن بو اوجالیغا
بلکه ده بیریسی ال سیله جکدیر!
یووالار داغیلدی نئچه بوداقدا،
قزئت اولمالییدی آغاجلار تک – تک
مئشه نی قیریردیق، مئشه لر حاقدا
هیجان سیقنالی چاپ ائله تدیرک.
یووانی اوچوران انسان اَلییدی…
دویساقدا قوشلارین مصیبتینی،
کیمسه او بوداغا کؤچورمه لییدی
آنا طبیعتین محبتینی.
قاییتدیم او یئردن من یانا – یانا،
بویلاندیم آرخایا یوز دفعه آزی…
کسیلمیش قوْواغین شاه وقارینا
لاییق اولاجاقمی یازدیغیم یازی؟!
تیتره ییر الیمده اوچونور قلم،
باشیما ائله بیل دونیا دار گلیر.
گؤزومون اؤنونه بو ساعات، بو دم
کاغیزا چئوریله ن آغاجلارگلیر.
(شاهمار اکبرزاده)
اویانمیش
تاریخین اگر دفترین آچسان، گؤره جکسن،
هر بابی و هر فصلی قیزیل قانلا بویانمیش!
بیر نئچه قیزیل قبَه لی معبد تیکیلرکن،
خلقین ائوی اوچموش باشینا، خرمنی یانمیش.
اینسان کی، حیات فلسفه سین آنلاماز اولدو،
دونیادا، و افسانه یه، افسونه اینانمیش.
شاهانه سارایلاردا گئجه توی توتولاندا،
بیر چوخ قاپیلار غمله و ماتمله قاپانمیش.
گؤردونمو، سورو ایچره گئدن قوردو؟ آماندیر!
باخ، قویروغونا، گؤزلرینه، سانما چوبانمیش،
عصرین او قاری دایه سینه سؤیله کی، بیرده!
آرتیق دئمه لایلای کی، یاتان ائللر اویانمیش.
(حبیب ساهر)
اورَگیمین بیر تیکه سین داشا دؤندردیم،
یاناندا سنه بیرزاد اولماسین.
دئمه کی، داش اورَگیوی گتیرمیشدین
اورَگیمین یوخاری باشینا.
***
گوندوزو گئجه دن چیخدین،
گئجه یاری اولدو!
منی اؤزوندن چیخماکی،
یاریم قالارسان گئجه یاریسی!
***
اؤلولرین الیندن چیخان،
اؤلومجول گونش،
اود اولسا، اوتوردوغو یئری یاندیرا بیلمیر؛
داغلارین دالیندان اؤزونوقالدیرا بیلمیر.
(فرانک فرید. ایپک)
اونلار گؤروشدولر: آیلی گئجه یدی
اوغلان پیچیلتییلا سئویرم دئدی
«عهدیندن دؤنه نین گؤزو اوْیولسون
آی دا عشقیمیزه قوی شاهید اولسون»
اونلار آیریلدیلار، آیلی گئجه یدی
اوغلان باشقاسینا سئویرم دئدی
آی گیردی بولودا، اوزونده کدر
قورخدوکی یئنه ده شاهید چکه لر
(نبی خزری)
اَینیمه گلمه ین پالتارلاریمی،
آنام گولومسه یه رک یاراشدیراردی
_ « لاپ سنین اَینینه تیکیلیب! » دئیه ردی!
آمما
آینامیز…
شالواریمی ایکی یاش اؤزومدن کیچیک
کؤینه ییمی اوچ یاش اؤزومدن بؤیوک گؤسترردی!
من آناما اینانمیشدیم
آینامیز یالان سؤیله ییردی !
(ابولفضل ثوابی)
تهیه و تنظیم : الهام عبادی ( دبیر سرویس تورکی )
پایگاه خبری توران
Wednesday, 8 May , 2024