دسترسی ها

قیشین دوندوروجو بیر گونو ایدی. سویوق قیلینج کیمی کسیردی. گؤیلر ماتملی‏لر کیمی، قارا چارشابا بورونموش، داغلار، چؤللر آغ کفن‏له اؤرتولموشدو. کوچه‏ لرده کوما‏- کوما دوران قارلار اوزه ‏رینده قارغالار قورخاق باخیشلارلا گزینیردی. قالین پالتو، ایستی پالتار گئیینمیش آداملار بزکلی و ایستی منزیل‏لریندن چیخیب پییادا یا ماشین‏لاری ایچینده راحات- راحات خییابانلاردان گئچیردیلر. بو دوندوروجو قیش، اونلار اوچون ایلنجه ‏دن باشقا بیر شئی دئییلدی.

دونیادا بوتون چتینلیک‏لر یالنیز اینسانلیغین یوخسول قیسمینه نصیب‏ ایمیش!

قوربان بازار اوجوندا مکتوب یازان همشهریسی میرزا فرضعلی‏نین یانیندا اوتورموش، سویوقدان اللری، اوزو بوزارمیش، بیر الی ایله کؤهنه و ییرتیق پالتارلارینین آچیق یاخاسینی توتاراق، او بیری الی ایله ده آیاقلارینا بوز کیمی یاپیشان ییرتیق چوستون پالچیغینی تمیزله ‏یه- تمیزله‏ یه میرزایا دئدی:

‏- میرزا، منه بیر مکتوب یاز! بیلیرسن کی، هر ایل سنه نه‏ قدر خئییر وئریرم. وطن‏دن گلدیییم بیر ایل اولماز، آنجاق بونونلا سنه بئش مکتوب یازدیریرام.

میرزا فرضعلی سویوقدان دونموش اللرینی اوووشدوردو. اسنه‏ یه –اسنه‏ یه بیر کاغیذ پارچاسینی دیزی اوستونه آلاراق دئدی:

‏- همشهری ، نه یازیلاجاق؟

قوربان میرزا فرضعلی‏یه بیر آز دا یاخینلاشدی. گیزلی بیر سؤز سؤیله‏ ییرمیش کیمی فیسیلدایاراق دئدی:

‏- میرزا، اوولجه مندن اوشاقلارین آناسینا سالام یاز، – یاز کی، آناخانیمین، مَمیشین گؤزلریندن منیم عوضیمدن اؤپسون، اونلاردان گؤز- قولاق اولسون. سونرا یاز کی، منده، شوکور آللاها، ساغ و سالاماتام. قولامیرزا ایله سیزه اون بئش مانات گؤندردیم. بایرام قاباغی یئنه گؤندره ‏جه ‏یم؛ اوشاقلار کورلوق چکمه‏ سینلر، اؤزوم ده یازین آخیر آییندا گله ‏جه ‏یم. میرزا فرضعلی قلمی مرکبه باتیریب یازماق ایسته‏ دی. مرکب غلیظ اولدوغوندان یازمادی. میرزا آغزینین سویوندان بیر داملا مرکب دامیزدیریب قاریشدیردیقدان سونرا یازماغا باشلادی.

قوربان دؤشوآچیق پالتوسونون و کؤینه‏ یینین آراسیندان گؤرونن، سویوغون تاثیریندن دیک –دیک دورموش قیللارینی پالتونون یاخالیغی ایله اؤرتوب، دئدی:

‏- میرزا عمی، بیر یامان آدامین قویوسوندا ایشله ‏ییرم. قویو ایندی اوتوز مئتیردن آشاغی یئنیب، نه ‏قدر یالواریریق:” آی آغا، حاققیمیزی بیر آز آرتیر، آشاغی گئتمک چوخ چتین‏دیر، نفتین ، گازین ایییندن نفس توتولور ” ، ظالیم اوغلو راضی اولمور. دئییر : ” اوولکی شرطیمیزله قازاجاقسینیز، یوخسا حاققیزی وئرمیه ‏جه یم ” .

میرزا، بورادا پول قازانماق چوخ چتین‏دیر. سنین پئشه‏ ن یاخشی‏دیر. گونده بئش- اون کاغیذ یازسان بسیندیر. آللاه برکت وئرسین. داها نه ایسته ‏ییرسن؟

میرزا فرضعلی قلمی قلمدانا قویدو، دیوارین دئشیییندن ایکی بارماغی آراسیندا بیر قده‏ر تورپاق آلیب، مکتوبون اوستونه تؤکه ‏رک قورودا –قورودا جاواب وئردی :

‏ – همشهری . اوزاقدان دؤیوش آداما آسان گلیر. منیم صنعتیم بیلدییین قدرده یونگول دئییل. قیش –یاز کوچه باشیندا موشتری یولو گؤزله ‏مکدن آدامین گؤزلرینه قارانلیق چؤکور. ائله گون اولورکی، بیر نفرده موشتری گلمیر. میرزا مکتوبو قوربانا اوخودو. قوربان میرزانین آغزیندان چیخان کلمه ‏لری یییه ‏جکمیش کیمی آغزینی آچمیش، دیقتله اونو دینله ‏ییردی. سونرا اوزونده، گؤزلرینده سئوینج اولاراق دئدی:

‏- قولام‏حوسئینه ده سالام یاز، یازکی، من گلینجه اوشاقلاردان گؤز- قولاغ اولسون. منه یازسین‏ گؤروم بیزیم قیزیل اینک یاخشی‏دیرمی؟ کور آتی ساتیب یا یوخ؟ بیرده یازکی، گلنده آناخانیما گوللو- گوللو دستمال، ممیشه ده قیرمیزی کؤینک گتیرجه ‏یم.

میرزا فرضعلی مکتوبو یازیب بیتیردیکدن سونرا بوکوب پاکاتا قویوب و اوزونو قوربانا توتوب سوروشدو؟ – همشهری، پاکاتین اوزو کیمین آدینا اولاجاق؟

‏- هه، میرزا، یازکی، قوربانین اوشاقلارینین آناسینا یئتیشه‏ جک.

میرزا پاکاتین اوزونو یازیب قوربانا اوزاتدی . قوربان مکتوبو آلیب سئوینجک ایکی الی آراسیندا دیقتله باخدیقدان سونرا قوینونا قویماق ایسته‏ دی. مکتوب الیندن یئره دوشدو. مکتوبو تئز گؤتوردو. اویان –بویانینی تمیزله ‏ییب یئنیدن قوینونا قویدو. کیسه‏ سینی چیخاریب، ایکی شاهی میرزانین اووجونا قویوب دئدی : آل، همشهری ! بایرام قاباغی یئنه مکتوب یازدیراجاغام، مندن سنه چوخ خئییر چاتاجاق ، – دئییب گئتدی.

( آردی وار )

تهیه و تنظیم : الهام عبادی ( دبیر سرویس تورکی )