دسترسی ها

پایگاه خبری توران :« طنز»  شعر ادبیاتیمیزدا، خصوصی اولاراق آذربایجان ادبیاتیندا احتشاملی و اؤنملی دوروما مالیک‏دیر. « طنز»، « هجو»‏ین خلافینا اولاراق، هر اوخوجونو، هر دینله ‏یه‏ نی گولدوردویو حالدا، ایچه ‏ریسیندن آغلادیر و روحوندا، ده ‏رین تاثیر یارادیر.بو سببه دونیا گؤروشلو طنز یازان شاعیرلریمیز، اولدوقجا آزدیلار و هر طنز یازان بیر شاعیره ملی و اجتماعی شاعیر دئمک اولماز.
آذربایجانین طنز یازان شاعیرلریندن: علیقلی غمگسار، علی نظمی « سئژیم قولو»، میرزه علی اکبر صابر، موللا جواد مذنب، محمد بی‏ریا، سید مهدی اعتماد ناطقی، علی اکبر حداد، شبیسترلی معجز، عمران صلاحی، ساپلاق، اردبیللی، راثی، کریمی و یالقیزی گؤسترمک اولار.
بو شخصیت‏لردن بیر عده‏ سی دونیا گؤروشلو طنز یازان و بیر حصه ‏سی ده تکجه ساتیرا سؤیله ‏ین و ایلنجه قوران شاعیرلردیرلر.
بورادا بیز تبریزلی طنز یازان شاعیر « یالقیز» دان سؤز آچیب، سیز عزیز اوخوجولارلا تانیش ائتمک ایسته‏ ییریک:
یالقیزین اؤز خلقی، خصوصا عمومیت‏له جامعه‏ سی ایله سرت باغلیلیغی واریدیر، اگر هنر احساس و محرومیت تؤره ‏مه ‏سی‏دیر « یالقیز» هنرمند بیر شاعیریدیر، چونکو اوندا هم ده ‏رین احساس واریدی هم‏ده یوخسوللوغو یاخیندان تجربه ائتمیش بیر انسانی‏دیر.
« یالقیز» شعرلرینده موضوع‏لاری یاخشی سئچیب، و اونلاری طنز فورماسیندا گؤزل نوماییش ائتدیرمیشدیر، ائله بو سببه گؤره خالق آرا محبوبیت و شهرت قازانیب‏دیر. خالق اونون اثرلرین سئوه – سئوه اوخویور و سونسوز علاقه ایله دینله ‏ییر، چونکو او اؤز چئوره ‏سینده‏ ن اولان حادثه ‏-لردن و باشا گلن چتین‏لیک‏لری آسان ائدیب، تازا سؤزلر و تازا ترکیبلر یاراتمیشدیر.
« یالقیز» بو شاعیرین تخلوصو اولوب، آدی « مجید» شهرتی « صباغ ایرانی» دیر کی ۱۳۱۶ نجی ایلده تبریز شهرینده زحمتکش بیر عایله ده آنادان اولوب، ابتدایی تحصیلاتین باشا وئریب، اورتا تحصیلاتین ایسه گئجه ‏لر داوام ائتدیریب. بیر مدت ارتش‏ده خیدمت ائدیب سونرا بازاردا ایشله‏ مه‏ یه باشلاییب.

ادبیات خادمی؛ یحیی – شیدا

یالقیزین شعرلریندن:
« دولانیر آی دالیمیزجا »
گونه ‏شیک عشق گؤیونده، دولانیر آی دالیمیزجا
گول – چیچکلی او باهاریق کی، گلیر یای دالیمیزجا
آنلایانلار بیزه آلقیش دییه‏ جک، هر زامان اولسا
انلامازلار دا یامان سؤیله‏ یه‏ جک، آی دالیمیزجا
ده‏لی اولساق دادی یوخ، تک بیزه دیوانه دئسینلر
لذتی اوندادی کی، خلق باسا های دالیمیزجا
آختاریب بیزلری ویرانه کؤنوللرده تاپارکن
مورود اولموش بیزه میلت، سورونه دای دالیمیزجا
هی سؤیوشدور وئره‏ جکلر دالیمیزجا گؤزو دارلار
گؤز آچیقلار دا سئوینج ایله سلام پای دالیمیزجا
ایندی خلقین حالینا، درد – اودونا وای دئییریک بیز
گلی بیر گون ده کی ملت دییه‏ ر، ای وای، دالیمیزجا
کیمسه سد باغلایا بیلمز، بو آخینلار قاباغیندا
بیز او جوشقون دنیزیک، دائم آخیر چای دالیمیزجا
نه قد‏ه‏ ر کی، دیری‏ییک، خلقه خئییر یوخ مالیمیزدان
جان کی، چیخدی، چیخیلیر یوخسولا دا پای دالیمیزجا
بیزلره صدری دویو چاتسادا، آنجاق کوپن ایله
نه‏ دی معناسی پلوو دمله‏ مه تای – تای دالیمیزجا
بیز کی ایتگین یاشاریق اؤلکه‏ ده میلیونلار ایچینده
گؤز کی یومدوق، قورولار شنلی قورولتای دالیمیزجا
دیری‏لیکده تانی‏یان یوخ، ائله‏ کی حقه قووشدوق
بوللو رحمت یوکودور کی گَل اوتور سای دالیمیزجا
بیز یاشارکن سازی سیندیردیلا محو اولدو عاشیقلار
بیز کی گئتدیک، چالینار هر گئجه نای – نای دالیمیزجا
سن بو اووسونچویا باخ کی، ائله یوخلاتدی بو خلقی
اویموش حالدا گؤروسن، سؤیلورو لای – لای دالیمیزجا
بیز کی، مای بایرامی اوسته قارا زیندانلارا دوشدوک
له ‏له گیریان دولانیر ایندی بیر آی، مای دالیمیزجا
وطن اولادینا سیزدن سورا « یالقیز» اومودوم وار
قویماسینلار بو امکلر اولونا، ضای دالیمیزجا

« تاپماجا »
قارداش او نئجه یئردی کی، انسانی ازه‏ رلر؟
دینمز – سؤله ‏مزدن،او کی وار، سؤز ده بزه ‏رلر
حق سؤز دییه‏ نین فوری چالارلار دهنیندن
آغزیندا قویارلار سؤزونو، لب‏ده بوزه ‏رلر
تقلیدچی‏لرین، ایشلری تزویردی مطلق
بند ائتمه‏ یه پولچوک، دوشوب هریانی گزه ‏رلر
یالتاقلارین اوردا، سؤزو کئچگین، ایشی ایشدیر
کیم اولماسا یالتاق، اونا مین عیب دوزه ‏رلر
لاپ دوردوغو یئرده آداما، بؤرک ده قویارلار
دومسوک ده ووروب، دالدا – بوجاقلاردا سوزه‏ رلر
اؤز تایلاری‏نین عئیبی‏نی اؤرت – باسدیر، ائدرکن
بیر سهوه مخالفلرینین بوینون اوزه ‏رلر
آشکاردا گؤزللر چیخیب اوردا گزه بیلمز
گؤرجک گؤزلین باشینی چیرکین‏لر ازه ‏رلر
چوخ ترسه ‏دیلر، دؤزمه‏ لی یئرلرده داشارلار
چوخ گولمه ‏لی‏دیر، داشمالی یئرلرده دؤزه ‏رلر
ییرتارلار ازل پرده‏ نی بیر کلمه سؤز اوسته
« یالقیز» سورا مین خبط و خطا ایله گؤزه ‏رلر

تهیه و تنظیم : الهام عبادی ( دبیر سرویس تورکی )