دسترسی ها

پایگاه خبری توران :بیری واریدی. بیری یوخ ایدی. بیر کیشی واریدی، بیرده اونون بیر آروادی. اونلارین بیر تکجه اوغول اوشاقلاری واری ‏ایدی. کیشی‏نین آدی آتا‏کیشی، آروادین آدی سونا، اوغلانین دا آدی گول اوغلان‏ ایدی. اوغلان اون‏ یاشینا چاتدیقدا آناسی اؤلر. آتا کیشی گئدیب بیر چیل چوْپور، اره ‏میک بیر قادین آلار. بو آروادین اوشاغی اولمادیقدان اونا اره ‏میک فاطما دئییردیلر. ننه ‏لیک اولان اره ‏میک فاطما، بیر – ایکی آی گول اوغلانا خوش باخیب یاخچی یئتیشدی. بیر ایکی آی‏دان سونرا ننه ‏لیک، اوغلانی اینجیتمه‏ یه باشلادی. آتانین ایییرمی – اوتوز باش داواری واریدی. اونلاری یالنیز اون یاشیندا اولان گول اوغلان اوتاراردی. ننه‏ لیک قوی یئتیم گول اوغلان آجیندان اؤلسون دئیه اونا یاوانلیق قویمازدی. گول اوغلان چؤلده داغارجیغی‏نی آچدیقدا یالنیز بیر پارچا آرپا چؤره ‏یی گؤروب اونو یئییب آغلاردی. ننه‏ لییینین قورخوسوندان آجلیغینی، چؤره ‏یی‏نین یاوان اولماسینی آتاسینا آغاردا بیلمزدی. گول اوغلان بیر گون چؤلده اؤز حالینا آغلاییردی داوارین ایچینده‏ کی بیر قارا قوچ اونا یاخینلاشیب سوروشدو : گول اوغلان نییه آغلاییرسان؟ – اوغلان دئدی : اؤز گونومه آغلاییرام. نییه آغلامایاجاغام ننه ‏لیک گلندن من یاوانلیق اوزو گؤرمه‏ میشم. ائوده ده چوبوغو گؤتوروب دوشور جانیما. قارا قوچ دئدی : داریخما. چوبوغونو وور منیم بئلیمه دی‏ء « حؤکمی سولئیمان عئشقینه بیر بوشقاب پیلوو قاتیغی اوستونده بیر دسترخان چؤره‏ ک‏له حاضیر اولسون » گول اوغلان چوبوغونو قارا قوچون بئلینه ووروب، دئدی : « حؤکمی سولئیمان، عشقینه بیر بوشقاب پیلوو قاتیغی اوستونده بیر دسترخان چؤره ‏ک‏له حاضیر اولسون » بونو دئجه‏ ک ایسته‏ دییی یئمک‏لر قاباغیندا حاضیر اولدو. گول اوغلان یئییب ایچیب توخالدی. گول اوغلانین گوندن – گونه توکو دورولدو. ننه ‏لییی دئدی : من اونا نه قده‏ر آز چؤره ‏ک قویورام، قورویوب اؤله ؛ آنجاق بو گونو – گوندن دیرچه ‏لیر. بو ایشلر هامیسی قارا قوچون باشیندادیر. چونکی بو یئتیم اونون‏لا دانیشیر.
بیر گون ننه ‏لیک اؤزونو ناخوش‏لوغا ووروب آتاکیشی‏یه دئدی : اؤلوره‏ م ساری‏لیق آلیزی توتموشام. حکیم‏لر قارا قوچون اتینی منه درمان دئمیشلر. کیشی دئدی : آللاها شوکور! بیر قارا قوچوموز وار. اونو سنین اوچون کسریک. گول اوغلان آتاسی ایله ننه ‏لییینین سؤزلرینی ائشیدیب آغلایا – آغلایا تؤوله‏ ده قارا قوچون یانینا گئدیب سؤزونو اونا یئتیردی. قارا قوچ دئدی : قورخما منی کسنده آتان سنه دئیه‏ جک گئت پیچاغی گتیر. گئدرسن اوراغی گتیره ‏رسن. یئنه دئیه‏ جک گئت پیچاغی گتیر بو یول گئده رسن اوخلووو گتیره ‏رسن او سنه آجیخلانیب، منی اؤتوروب، پیچاغی گتیرمه‏ یه گئده‏ جک. اوندا سن منیم اوستومه مین ؛ بوینومدان برک – برک یاپیش. من‏ده گؤیه اوچوب ، سنی یاخچی بیر یئره آپارارام. آتاسی قوچو تؤوله ‏دن چیخاریب بوینوندان یاپیشیب اوغلونا دئدی : گئت او پیچاغی گتیر. گول اوغلان گئتدی اوراغی گتیردی. یئنه‏ ده آتاکیشی گول اوغلانا حیرصله ‏نیب دئدی : اوغول ! سنه دئدیم پیچاغی گتیر اوراغی یوخ. بو یول اوغلان گئدیب اوخلووو گتیردی. آتاسی آجیخلانیب، گول ‏اوغلانین اوستونه چیغیریب، بیر شاپالاق ووروب، دئدی : توت بو قوچو، اوزوم پیچاغی گتیریم. آتا کیشی پیچاغی گتیرمه‏ یه ائوه گیردی. گول اوغلان حیط‏ده تئز قارا قوچون اوستونه مینیب، بوینوندان برک – برک یاپیشدی. قارا قوچ قانات چیخاردیب گؤیه قالخدی. گئتدی – گئتدی بیر میناره‏ نین باشینا قونوب، گول اوغلانی اوردا یئره قویدو.
قارا قوچ گول اوغلانا دئدی : گل سنه ایکی بالابان وئریم. کئفین ساز اولسا،گولر بالابانی چال. من‏ده کئفی‏نین سازلیغینی بیلیم. یوخسا باشیندا بیر ایش اولسا، قملی اولسان، آغلار بالابانی چال. من هر یئرده اولسام اؤزومو سنه یئتیره ‏رم. قارا قوچ اوغلانی میناره‏ نین باشیندا قویوب گئتدی اؤزوده هر گون گلیب اوغلانا باش چکردی.
بیر گون گول اوغلان داریخدی. قوچ ایله دانیشماق ایسته‏ دی. آغلار بالابانی چالیب، قوچ اؤزونو یئتیردی. اوتوروب دانیشدیلار. آلتی – یئددی ایل گول اوغلان میناره ‏نین باشیندا قالیب، یئکه ‏لدی. بیر گؤزل جاوان اوغلان اولدو. یئنه ده بیر گون گول اوغلان داریخیردی. قوچ ایله دانیشماق ایسته ‏دی. آغلار بالابانی چالیب، قوچ اؤزونو یئتیریب، اوتوروب دانیشدیلار. اوغلانین کؤنلو آچیلدی. آنجاق آغلار بالابانی چالاندا شاه ایسماییلین ائلناز آدلی بیر قیزی، بالابانین سسینی ائشیدیب، هوشدان گئده ‏ر. آییخیب آلیزلانار. یورغان – دؤشه ‏یه دوشوب، ناخوش‏لار. نه‏ قده ‏ر حکیم، دوعا یازان، باخیجی رمل‏چی گتیره ‏رلر قیز توختاماز. ائلناز دئیه ‏ر : من بیر آغلار بالابان سسی ائشیتمیشم او بالابانچی‏نی تاپیب گتیرمه ‏لیسیز. یوخسا توختامارام. اؤلکه ‏ده بوتون بالابانچی‏لاری ییغیب گتیردیلر، ائلنازین یانیندا بالابان چالدیلار. ائلناز دئدی : بونلار من دئدیییم بالابانی چالمیرلار. بونلار دئییل.
بیر قاری دئدی پادشاه ساغ اولسون! من او بالابان چالانی تانیییرام. بیر آغیریما قیزیل، بیر آغیریما گوموش وئرین گئدیب او بالابانچینی یانیزا گتیریم. شاه قبول ائدیب، دئدی : قاری آنا! سن گئت گتیر، قیزیم دئیه‏ ن اولسا اوندا سنین دئدییینی وئره ‏جه‏ یه ‏م.
قاری آرخایین اولوب، اوغلانی گتیرمه‏ یه مینا ره‏ نین یانینا گئتدی. قاری هوْررا بیشیرمک اوچون بیر اوجاق قوروب، اوجاغین اوستونده قازانی بؤیرو اوسته قویدو. گول اوغلان میناره ‏دن باخیردی. دئدی : قاری آنا! قازانی ائله قویما، بئله قوی. بو دفه قاری قازانی او بیریسی بؤیرو اوسته قویدو. اوغلان دئدی : قاری آنا! قازانی ائله قویما، دیبی اوجاق اوسته قوی. قاری دئدی : اوغول قوجالمیشام، قادان – پاتان آلیم گؤزوم سئچمیر. گل آشاغی بو قازانی دوزه ‏لت گئت. گول اوغلان قارییا اوره ‏یی یاندی. قازانی دوزه ‏لتمک اوچون آشاغی یئندی. قاری تئز شاهین چئوره ‏ده گیزله ‏نمیش قاراوول‏لارینا ال ائله‏ ییب، قاراووللار اوغلانی باسیب توتدولار. گول اوغلانی شاهین سارایینا آپاردیلار شاه ایسماییل گول اوغلاندان آغلار بالابانی چالماسینی ایسته ‏ر. گول اوغلان دئیه ‏ر یوخ! من آغلار بالابانی چالسام قوچوم گلر، آللاه ائله ‏مه ‏میشدن اونا بیر زاد اولار. شاه دئدی : سنی یئددی قاپیدان کئچیردیب بورایا گلمیشیک. آلتی‏سی تاختادان، سون قاپی‏دا دمیردن‏دیر. سنین قوچون هاردان گلیب بورا چیخا بیلر؟ اوغلان آغلار بالابانی چالماق ایسته ‏مه ‏دیکده شاهین قاراووللاری – یاساووللاری اونو هده ‏له‏ ییب، دئدی‏لر : چالماسان شاه سنی اؤلدورتدوره ‏جک. گول اوغلان مجبور اولوب آغلار بالابانی چالماغا باشلادی. قیز یئریندن دوروب گؤزونون یاشینی تؤکوب، ائله بودور دئییب، آغلادی. قارا قوچ آغلار بالابانی ائشیدیب، گول اوغلانین باشیندا بیر ایش اولماسینی دویدو. اوچا – اوچا گلیب اؤزونو شاهین سارایینا چاتدیردی. آلتی تاختا قاپینی بوینوزو ایله سیندیردی. یئددینجی قاپی دمیر اولدوغوندان بوینوزو بئینینه باتاراق اوزانیب جان وئردی. هامی دمیر قاپی‏دان بیر سس ائشیدیب، قاپییا ساری قاچدیلار. قارا قوچو قاپی‏نین آغزیندا اؤلموش گؤردولر. گول اوغلان هؤنکور – هؤنکور آغلادی، گؤیدن بیر گؤی ایشیق یئندی. ایشیقدان بیر آغ ساققال کیشی چیخدی. بو کیشیی‏نین اوز – گؤزونو ایشیق پارچاسی بورودویوندن کیمسه اوزونو گؤرمه ‏دی. ایکی رکعت حاجت نامازی قیلدی. گولر بالابانی گول اوغلاندان آلیب چالدی. قوچ دیریلیب آیاغا دوردو. قوجا گول اوغلانی شاها تاپشیردی. شاه دئدی : بو اوغلاندان آرخایین اولون. اونو اؤزومه کوره‏ کن ائله‏ یه ‏جه ‏یم. قوجا، قارا قوچون اوستونه مینیب، ساغ اوللاشیب گؤیه اوچدولار. بیلینمه‏ دی هارا گئتدیلر. شاه یئددی گون یئددی گئجه گول اوغلان‏لا قیزینا توی توتدو. یئدیلر، ایچدیلر، چالدیردیلار. گؤیدن بیر سبد آلما دوشدو، بیری دئیه‏ نین، قالانی دا ائشیدنلرین.

تهیه و تنظیم : الهام عبادی ( دبیر سرویس تورکی )