دسترسی ها

پایگاه خبری توران :گونلرین بیر گونونده، شاه عابباسین دوربونونده، آللاه وئردیخان، شاه عابباسین ائله‏ جه بیلن وزیری ایدی.آللاه وئردیخان شاه ‏‏عابباسین ایشلرین قیناییر، آرالاریندا سؤز چیخیر. آللاه وئردیخان شاه‏ عابباسدان آجیق ائله‏ ییب سارایدان گیزلی چیخیب بیر بیلینمز یئره گئدیر.

ایران اؤلکه ‏سی‏نین بوتون ایشلری بیر – بیرینه دییب قاریشیر. موشگوللری آچان اولمور.
شاه عابباس چاره ‏سیز قالاراق کوچه ‏لرده جار چکدیریب جماعته دئییر:
– هر کیم وئردیگیم قوْچو بیر آی اؤز آغیرلیغیندا ساخلایا یبلسه، اونا بوللو انعام وئره‏ جگم. بو شرط‏له کی، قوْچ نه بیر میثقال آریقلایا نه بیر میثقال کؤکه ‏له. هئچ کس قوْچو قبول ائتمیر.
بیر گون بیر کیشی بیر دییرمانا دن آپارمیشدی. دییرماندا ایشله ‏ین بیر قوجا، اوندان سوروشور:
– اؤلکه ‏ده نه خبر؟
دنچی دئییر: شاه‏ عابباس جار چکدیریب دئییب بیر قوچوم وار، هر کس اونو بیر آی اؤز آغیرلیغیندا ساخلایا بیلسه، بوللو انعامی وار.
دییرماندا ایشله‏ ین قوجا دئییر: گئت اوْ قوچو آل، بیر قارانلیق تؤیله‏ ده اونا یئم – سو وئر. گؤزله هئچ یئردن اونا ایشیق دوشمه ‏سین. دنچی گئدیب شاهدان قوچو آلیر. بیر آیدان سونرا قوچو گتیریب شاها تحویل وئریر. قوْچو چکدیریرلر. بیر میثقال کؤکه ‏لمیشدی. شاه دئییر: قوچ بیر میثقال کؤکه ‏لیب آمما عئیبی یوخ. بو ایش فقط آللاه‏ وئردیخانین الیندن گلر. سن اونون یئرین بیلیرسن. تئز اول اونون یئرین دیء.. دنچی دئییر: دییرماندا بیر قوجا کیشی منه بو قوْچو اؤز آغیرلیغیندا ساخلاماغی اؤیره ‏تدی. شاه ‏عابباس دئییر: گئدین اوْ قوجانی بورا گتیرین. اوْ آللاه‏ وئردیخان اولمالیدیر. شاهیْن قیزیل باشلاری گئدیب او قوجانی گتیریرلر. شاه دوز دئییردی. اوْ همن آللاه وئردیخان ایدی.
شاه عابباس آللاه وئردیخانلا باریشار، اونا دیل – آغیز ائدیب عذر ایسته‏ ر. سونرا شاه اوندان سوروشار: قوچ ندن بیر میثقال کؤکه ‏لمیشدی؟
آللاه وئردیخان دئیه ‏ر: قوچ بسله‏ ین تاپشیریغیمی یئرینه یئتیره بیلمه ‏میشدی. قوچ بسله ‏نیلن تؤیله ‏یه بیر ذرره ایشیق دوشوب اونا گؤره قوچ بیر میثقال کؤکه ‏لبدیر.
اوندان سونرا شاه ‏عابباس سؤز وئریرکی، ایشلری آللاه وئردیخانلا دانیشمادان گؤرمه ‏یه.

گوزگوده کی آرواد ایمیش!
قدیم زامانلاردا، بیر شکی‏لی آرواد، گوزگو باره سینده بیر شئی‏لر ائشیتسه‏ ده، آنجاق گؤزگونون اؤزونو گؤرمه ‏میشدی. گون گلیر، آروادین اری بیر گوزگو آلیر. کیشی هر گون گوزگویه باخیب سونرا دا اونو گیزله‏ درمیش. گونلرین بیر گونو آرواد گوزگونون یئرینی اؤیره ‏نیرو اونو اله کئچیریر. گوزگویه باخان کیمی دوداغین بوزه – بوزه دئییر:
– باشیما خئییر! … من ائله بیلیردیم کی، کیشی اؤزونه باخیر، سن دئمه گوزگوده ‏کی آروادیمیش !

تهیه و تنظیم : الهام عبادی ( دبیر سرویس تورکی )