دسترسی ها

کلفچه لر بطنینده گؤیرمیش چیچک ایدین
مندیلیندن قان قوْپوردو
گؤزلرینه دالدیقجا
سؤزلرینه کدر هوْپوردو
قیرمیزیلاری سوْوشدورموشدون
قارالارلا یارالار اوْرتاسیندایدین
بو سن ایدین , سن …
مین بیر گئجه نی بیر ساعاتدا گلمیشدین
گلیشینله گئدیشینی دویمادی زامان
سن یوْخ ایدین , یوْخ…
دؤرد نالا چاپیردیلار کهر آتلارینی
ایندی وارکن , آدینی یازدی یاز
دادینی دادمادی قارانقوش
آدرئسینی سیچراتدی چیل سئرچه
بیزی اوْوسونونا سالدی سازاق
دووارلارین زهمینه سیغیندیق
قیروْو باغلاندیق داغداغان اۆزرینده
چاتلاق لارا باغیردیق
داش باغلانسین بو کۆچه نی
گلمدی آستا گلیشین
اسمه دی اسمر خبرین
گئجیکتدی بۆتۆن سؤزجۆکلر
اوْ کۆچه تینینده یئرینی بوْش ساخلادیق
توْمورجوقلاندی ماوی هوه سین
آرخامیزجا سو سپمه یه تاپیلمادی ” آنا “
پاس باغلاندی دیلیمیز
یاغدیردیلار قیزیل گۆلله نی
یوْلا سالدیلار قامچیلارلا
قانداللارا امانت دوْستوم
اوْ گئجه سوکوتونو اؤپدوم ,
اؤپدوم دوْستوم…
سنی وورارلار , دیزی اوسته چؤکرسن
گۆن اوْرتاسی چالینار قارا زورنا :
آزادلیغا اومود دوستاقلاری اونوت
دوستاقلاردان خیاوانلارا دوْلایی یوْل گئدیر
بیر آز تؤشکۆنۆ در دوْستوم
سؤیله , سؤیله کی نه لر گلدی باشینا
یوْخ – یوْخ ,
زهر ایچگیسینه دؤزوموم یوْخ
منی بوردا ساخلا
سئرچه نین سوْنو آجی اوْلور
ائرته نین ایعدامینا لعنت
ساری شفقین ساریلیغینا سالام
دومانین سرت لییینه آلقیش
گلمه دین , …
و بیزیم گؤروشوموز سحره قالدی

• نویسنده : سعید صادقی فر
• منبع خبر : اختصاصی توران