دسترسی ها

پایگاه خبری توران : بو خاطیره هئچ واخت منیم یادیمدان چیخماز. من چوبانلیق ائدن ایللرین بیرینده یای فصلی هر ایلدهکی کیمی «شاهوئردی» یایلاغینا کؤچ ائتدیک . من اوْ زامان آتامین یانیندا کؤمکچی گئدردیم. هامی منی « بالا چوبان » سسله یردی . بیر گون من آتاملا یایلاقدا قوْ یون – کئچیلری اوتاریردیم کی، آتام اوزونو منه توتوب دئدی :

– بالا چوبان ! من داغین اته یینده کی کنده گئدیرم . آخشام قاش قارالاندا قاییداجاغام ، سورودن میغایات اول . ایتلر ده کی یانیندادیر . سونرا سوروشدو : تک قورخمازسان کی؟ من بیلمه دیم کی، قورخارام یا یوخ ! یالنیز گولومسه دیم . آتام الینی کوره ییمه ووروب دئدی : باراکاللا اوغلوم ! بیلیردیم کی ، قورخمازسان ، سن داها بیر کیشی اولموسان !

آتام گئتدی … آخشام اولدو . من نه قده ر گؤزله دیم ، آتام گلمه دی . اؤز – اؤزومه دئدیم : حتمن گئجه نین قارانلیغیندا یوْ لو ایتیریب ، هاردان اولسا سحر گلر . اوره ییمه قورخو دوشموشدو ، یاتا بیلمیردیم . ایتلر ده یاتمیشدیلار… بیر

سس ائشیتدیم ، گؤره سن کیمدیر ؟ – دئدیم ؛ آدامدیر ، یوخسا جاناوار …

سسله دیم : آتا … آتا ! جاواب گلمه دی . یئنه هامان سسی ائشیتدیم . سانکی بیری حزین سسله آغلاییردی . دیققتله باخدیم … قارانلیقدا گؤزوم بیر بالاجا آیی یا ساتاشدی . ایسته دیم ایتلری هایلایام . دیلیم توتولدو . آیی منیم ایکی آددیملیغیمدا دایانمیشدی . بیر الینی گؤیه قالدیریب ، آغلاییردی . یاخشی باخدیم حئیوانین آیاغینا بیر چالغی تیکان باتمیشدی . تیکانی آیینین آیاغیندان چیخارتدیم . آیی آغلاماق سسینی کسیب و در حال اوْرادان اوزاقلاشدی . منیم حالیم اؤزومه گلدی ، قورخودان چیخدیم ، آمما یئنه ده یوخوم گلمه دی . گئجه یارییا چاتمیشدی .

آتامدان یئنه خبر چیخمادی . آی سود کیمی ایشیغینی داغ – داشا سالمیشدی … یئنه بیر سس قولاغیما چاتدی . یاخشی باخاندا ایکی آیینی گؤردوم . آنا و بالا اللرینده بؤیوک بیر شئی گتیریردیلر . قوْرخودان ایتلری اویاتدیم . آییلار ایتلری گؤردوکده اللرینده کی شئیی یئره قویوب گئری قاییتدیلار. من یاواش – یاواش اوْ شئیه یاخینلاشدیم ؛ بیر بال پته یی گؤردوم . دئمه ، آنا آیی منه بال سؤوقات گتیرمیشدی . آخی من اوْ نون بالاسینی آغیر درددن قورتارمیشدیم . سحر آچیلاندا ، آتام گلدی و من اونا ماجرانی دانیشدیم ، آتام گولومسه ییب، چوبوغونون توستوسونو گؤیه اؤتوروب دئدی :

– اوغول ! آنالارین چوخ بؤیوک اورکلری اولور، بال گتیرن آیی دا بیر آنادیر … اوغلوم … آنا !

« محمد قاضی »

تهیه و تنظیم : الهام عبادی ( دبیر سرویس تورکی )