پایگاه خبری توران : نئچه گون قاباق اوشاقلاریمین لَله‏ سینی گؤرمه‏ یه ایش اوتاغیما چاغیردیم . آخی پولیا واسیلوونا ایله حئسابیمیزی دورولتمامیز گرکیردی . او اوتاغیما گیرجک دئدیم : ‏- پولیا واسیلوونا ! خواهیش ائدیرم بویوراسیز حئسابیمیزا یئتیشک ، حتما سیزین پولا احتیاجیز وار آما او قده‏ ر اوتانجاقسیز کی احتیاجیز اولسادا اوندان سؤز آچمایاجاقسیز … […]

پایگاه خبری توران : نئچه گون قاباق اوشاقلاریمین لَله‏ سینی گؤرمه‏ یه ایش اوتاغیما چاغیردیم . آخی پولیا واسیلوونا ایله حئسابیمیزی دورولتمامیز گرکیردی . او اوتاغیما گیرجک دئدیم :
‏- پولیا واسیلوونا ! خواهیش ائدیرم بویوراسیز حئسابیمیزا یئتیشک ، حتما سیزین پولا احتیاجیز وار آما او قده‏ ر اوتانجاقسیز کی احتیاجیز اولسادا اوندان سؤز آچمایاجاقسیز … یاخشی، سیزه آیدا 30 مانات وئرمه ‏یه قرارلاشمیشدیق.
‏- باغیشلایین قراریمیز 40 ماناتیدی …
‏- یوخ 30 ماناتیدی … من دفتریمده یازمیشام . من هئچ واقت اوشاقلاریمین لَله‏ سینه اوتوز ماناتدان آرتیق وئرمه‏ میشم … یاخشی ، سیز ایکی آی‏دیر کی ایشله ‏ییرسیز.
‏- باغیشلایین ایکی آی بئش گوندور.
‏ دوز ایکی آی … دفتریمده اوجور کی یازمیشام دوز ایکی آیدی. پس بو قراردان سیزین آلاجاغیز مندن آتمیش مانات اولور. یاخشی ، بوندان دوققوز گونون تعطیل‏لرین چیخاخ . سیز قبول ائدیرسیزکی یکشنبه‏ گونلری منیم اوغلوم کولیا نی بوراخیب دولانماغا گئدیردیز. بو ایکی آیدا یکشنبه گونلریندن سونرا اوچ گون داها تعطیل‏یمیز واریدی .
پولیا واسیلوونانین هیرسیندن اوزو قیزاردی ، آما بیر کلمه دیلینه گتیرمه‏ دی …
‏- دوققوز یکشنبه ‏اینن اوچ بایرام … بئله ‏لیکله 12 مانات چیخیلار … دؤرد گونده اوغلوم خسته ‏لنمیشدی لَله‏ یه احتیاجی یوخیدی ، اوچ گونده سیزین دیشیز آغرییردی و خانیم سیزه استراحت اجازه‏ سی وئردی ،اون‏ ایکی‏نن یئددی اولار اون‏دوققوز. آتمیش مانات‏دان اون‏دوققوز مانات چیخسام … اولار ؟ … قیرخ بیر مانات … دوز اولار؟
پولیا واسیلوونانین گؤزلری قیزاریب بیر داملا یاش گؤروندو . او هیرسلی نئچه دفعه اؤسکوروب دسماللا گؤزلرینین یاشینی سیلدی آمما بیر سؤز دیلینه گتیرمه ‏دی …
‏‏- بایرام گئجه‏ سی بیر ده‏نه استکان سیندیردیز … ایکی مانت‏دا اونلارا گؤره چیخیلار. البته بو استکانین اوندان داها قیمتلی اولدوغونو بیلیرسیز . چونکو آتا بابا یادیگار ایدی. آما … ائله همن ایکی ماناتی حئساب ائله‏ یک‏ ¬- … بو دونیادا بیزه او قده‏ ر بئله زیان‏لار دییب کی داها عادت ائله ‏میشیک … هله سیزین دقت‏سیز اولدوغوزدان اوغلوم آغاجا چیخیب کؤینه‏ یی جیریلیب … یاخشی، اون مانات‏دا بوردان چیخیلار یئنه‏ ده سیزین دقت‏سیزلییزدن ، تزه گتیردیییمیز قوللوقچو ، قیزیمین بیر جوت باشماغینی اوغورلادی …
آخی ائوده بوجور ایشلرین مسئولیتی سیزینندی … سیز گره‏ک چوخ گؤز قولاق اولاسیز کی بوجور ایشلر اولماسین … بو ایشلر اوچون آیلیق آلیرسیز … یاخشی بئش مانات‏دا بوردا چیخیلار …
ژانویه ‏نین اونوندا سیز مندن اون مانات آلمیشدیز … پولیا واسیلوونا یاواشجا دئدی :
‏- من بئله بیر پول آلمامیشام !
‏- سیزین یادیزدا دئییل آمما من یازمیشام !‏
‏ – اولسون ایندی کی بویورورسوز قبول ائدیرم …
قیرخ بیر مانات‏دان ایییرمی یئددی مانات چیخین اولار اون دؤرد … بئچارا قیز شاشیرمیشدی. گؤز یاشلاری اوزوندن آخا – آخا سسی تیتره ‏یرک دئدی :
‏- من تکجه بیر دفعه پول آلمیشام . من سیزین خانیمیزدان بیر دفعه تکجه اوچ مانات آلمیشام … داها سیزدن پول آلمامیشام …
‏- دوغرودان ؟ نئجه اولوب من بونو یاددان چیخاردیب یازمامیشام . چوخ ساغ اولون … پس بو قراردان اوچ مانات اون دؤرد مانات‏دان چیخیلسا قالار اون بیر مانات …
خانیم بویورون بو سیزین پولوز.
من اونون ایکی آی ایشینه اون بیر مانات وئردیم … پولو آلیب تیتره‏ ک اللریله جیبینه قویوب سونرا یاواشجا دئدی:
‏- ساغ اولون ! …
یئریمدن دوروب اوتاغیمدا یئریمه‏ یه باشلادیم . هیرسده‏ ن بوغولوردوم . جاوان قیز منه حیرتله باخیب بیلمیردی نه ائله‏ سین . آخیرده اونون قاباغیندا دوروب دئدیم :
‏- سیزین بو ساغ ‏اولوز نه اوچون ایدی؟ تئز دئیین سیز نه اوچون مندن تشکور ائله‏ دیز ؟!
‏- پولدان اؤترو … مرحمت ائتدیییز پولدان اؤترو !
آللاهین بنده‏ سی ! مگرمگر گؤرمورسوز من سیزین باشیزا بؤرک قویدوم . یئنه ‏ده ساده ‏جه دئییرم من سیزین پوللاریزی اوغورلامیشام !
پس بو ساغ اولون نه اوچون‏دور؟!
‏- هله یاخشی‏دی کی سیز حئسابدان سونرا بیر پول وئردیز … آیری یئرلرده آدیمین آیلیغینی وئرمیرلر کی هئچ ، بوشلودا سالیرلار.
‏- آیری یئرلرده سیزه پول وئرمیرلر؟ حیرت ائله ‏ملی ایش دئییل ! من سیزله بالاجا بیر شوخلوق ائله‏ دیم. سیزه حیاتدان بالاجا بیر درس وئرمک ایسته‏ دیم . من هشتاد ماناتین هامیسی‏نی سیزه وئره‏‏ جه ‏یم و شوبهه ‏سیز کی حاققیزدیر. من بو پولو قاباقجادان حاضیرلاییب پاکاتا قویموشام . باخین پاکات میزین اوستونده … آمما نئجه اولار آدام بو قده‏ ر دیل‏سیز آغیزسیز اولسون ؟!  نییه ناحاق یئره سیزین آیلیغیزی چیخدیقدا هئچ بیر اعتیراض ائتمه‏ دیز؟ نییه دانیشمادیز؟ بو دونیادا دیری اولا – اولا حاققی قوروماماق اولارمی؟
جاوان قیزین دوداقلاریندا آجی بیر تبسم گؤروندو. اونون غیرطبیعی گولومسه‏ مه‏ سیندن فیکرینی اوخودوم :
“بلی اولار” .
من اونا وئردیییم بو آغیر درسدن اونو بیر مدت کدرلندیرمیشدیم . عذر ایسته‏ ییب قاباقجادان پاکاتا قویدوغوم هشتاد ماناتین هامیسینی اونا وئردیم . جاوان قیز یاشامی‏نین باشا باشیندا ایلک دؤنه اولاراق تام حاققی‏نی آلدیغیندان حیرتلندی. او باشینی آشاغا سالیب ال – آیاغینی ایتیرمیش حالدا اوتاقدان چیخدی من دالیدان اونا باخیب فیکیرلشدیم :
‏- بو دونیادا گوجلو اولوب ظولم ائیله ‏مک نه‏ قده‏ ر راحات ایشدیر !

آنتوان چخوف

تهیه و تنظیم : الهام عبادی ( دبیر سرویس تورکی )