دسترسی ها

پایگاه خبری توران : اوزون زامانلار اؤنجه، بیر – بیرینه تای اولان ار – آرواد واریمیش. بونلار آواملیقدا، ساده ‏لؤوح‏لیکده بیر‏- بیریندن گئری قالان دئییلدیلر. آنجاق بیری‏نین گؤردویو ایش او بیریسی‏نین خوشونا گلدییینه گؤره همیشه بیر – بیرلریله مئهریبان ایدیلر.
بیر گون بئله اولور کی، باشقا شئی‏لر آلماق اوچون پیه‏ ده‏ کی اینه ‏یی ساتمالی اولورلار. کیشی اینه ‏یین بوینونا چاتی‏نی سالیب، سورور بازارا. گؤرور کی، بازاردا کئچی ساتیرلار، کئچی خوشونا گلیر. اینه ‏یی کئچی ایله باش‏-باشا ده ییشیر. کئچی‏نی قاتیر قاباغینا سورور تویوق – جوجه ساتیلان یئره. اورادا بیر پیپییی قیرمیزی خوروز گؤرور، چوخ خوشونا گلیر. کئچی‏نی وئریب خوروزو آلیر، دوشور یولا. هارادا بیر شئی خوشونا گلیر الینده‏ کینی وئریب اونو آلیر. ائله بوجور آلیش – وئریش ائده – ائده ائوه بیر توربا تورش آلچا ایله قاییدیر.
آرواد کیشی‏نین گلدییی‏نی دویان کیمی سئوینه – سئوینه کیشی‏نی قارشی‏لاییر. کیشی‏نین چیینینده ‏کی توربانی یئره قویماقدا اونا کؤمک ائله ‏ییر. توربانی یئره قویا – قویا دئییر:
-‏ هه، کیشی دیء گؤره ک نه ‏یی ساتیب، نه ‏یی آلدین، نه قده‏ ر قالدی؟
کیشی چکینه – چکینه دئییر:
-‏ آرواد بیلیرسن نه وار؟ بازارا تزه ‏جه گیرمیشدیم کی، گؤردوم یاخشی بوینوزلو بیر کئچی ساتیرلار، خوشوما گلدی اینه ‏ییله باش – باشا دییشدیم.
آرواد دئییر: – نه اولار کئچی یاخشی حئیوان‏دیر. لاپ یاخشی ائله‏ ییب‏سن.
کیشی دئییر: – هله بیر دایان، بو هاراسی‏دیر. تویوق – جوجه ساتان یئرین یانیندان کئچنده بیر مخمل توکلوخوروز گؤردوم، خوروز نه خوروز! کئچی‏نی وئریب خوروزو آلدیم.
-‏ خوروز، لاپ یاخشی، نه عجب سنین یادینا دوشوب بیزیم تویوق‏لارا ائله بیر دنه خوروز لازیم ‏ایدی، ساغ اول کیشی!
کیشی دئییر: – هله بو هاراسی‏دیر، بیر دایان. تاخیل ساتیلان یئردن کئچنده آرپا گؤردوم. خوروزو وئریب آرپا آلدیم.
آرواد یئنه سئوینیر: – کیشی، یاخشی ائله ‏میسن، عجب ائله‏ میسن. بو بویدا حیطیمیز بوش – بوشونا قالیب. آرپانی سپیب عوضینه نه قده‏ر تاخیل بیچه ریک. اؤزوموز ده اون ائله ‏ییب، بیشیریب یئیه ‏ریک. تویوق – جوجه ‏یه ‏ده وئره‏ ریک.
کیشی دئییر: – آرواد هله دایان، آرپانی‏دا بیر توربا تورش آلچا ایله دییشدیم. بودور گتیرمیشم.
آرواد سئوینج‏له دئییر: – نئجه، تورش آلچا؟ من نه واخت‏داندی یئریک‏له ‏ییرم تورش آلچایا. سن نه آغیل‏لی کیشی ایمیش‏سن. منیم اوره ‏ییمدن کئچه ‏نی نئجه یاخشی بیلیب‏سن. آی سنین قادانی آلیم، آی سنین باشینا دولانیم.
کیشی ده راضی قالیرکی، ائله‏ دییی بازارلیق آروادی‏نین خوشونا گلیب. حال بو کی، بازاردان تورش آلچا ایله قاییداندا قورخوردوکی، آرواد اونو او کی، وار دانلایار.
آرواد اریله کؤمک‏لشیب تورش آلچا تورباسینی ان قیمتلی بیر نعمت کیمی ائوه آپاریر.
دوز دئییرلر کی، یار یارا تن گلنده سؤزلری‏ده، ائله‏ دیکلری‏ده ایش‏لری‏ده بیر – بیرینه خوش گلیر و اؤزلرینی دونیانین ان خوش‏بخت آدام‏لاری حساب ائدیرلر.
اودونچو کیشی ایله آسلانین حیکایه سی
بیری وارایدی بیری یوخ ‏ایدی. آللاه بنده ‏سی چوخ ‏ایدی. بیر اودونچو کیشی وار‏ ایدی گونده ‏کی گونده گئدیب مئشه ‏دن اودون ییغیب گتیریب شهرده ساتیردی کیشی بو پول ایله آرواد اوشاغی‏نین باشینی دولاندیریردی. گونلرین بیر گونونده اورماندا اولان آسلان اودونچو کیشی‏نین بالتاسی‏نین تاپ – توپ سسینی ائشیدرکن نریلده‏ یه – نریلده ‏یه، قابارا – قابارا، دیشلرینی خیرچیلدادا – خیرچیلدادا، ایسته ‏ییردی اونو قییناقلارینین آلتینا سالیب سؤکوب داغیتسین آمما کیشی‏یه یازیغی گلیب ال ساخلادی. بو دورومو گؤرن کیشی حئیوانین هئیبتی‏نی گؤروب آز قالدی سیچان دلیگین ساتین آلسین. آخی اورداکی حئیوانلار و یا خود اینسانلاردا اورمانداکی سولطاندان ایذین‏سیز مئشه ‏یه اصلاگیرنمه‏ ز ایدی. آنجاق اونلار بیر – بیرینه یاخینلاشارکن یوووشوب یولداش اولدولار. اوندان سونرا آسلان کیشی‏یه یاردیم ائدیب مئشه ‏نین قورو – قورو آغاجلاریندان کؤر – کؤتویوندن، جیر جوووروندن ایپین آراسینا ییغیب شله‏ سین قاییم چکیب دالینا آتیب گتیریب شهرده ساتیردی. بئله‏ لیک‏له اودونچو آسلانین یاردیمییلا بول – بول پول قازانیب بخته‏ور اولموشدو.
گونلرین بیر گونونده اودونچو کیشی قرار وئردی کی، بلکه آسلانین یوزده بیر یاخشیلیغینین بیرینی اؤده‏ میش اولا. بونون اوچون او آسلانی اؤز ائوینه قوناق چاغیردی. اونلار یئمه ‏یه باشلایاندا دئمه آسلانین آغزینین سویو آخسین. اودونچونون آروادی بو صحنه‏ نی گؤره ‏رک دئدی: اولماز ایدی بو حئیوانین یالین ائشیکده آتایدین یئیه‏ یدی؟ آسلان بو سؤزو ائشیدنده آز قالدی کی، هیرسی باغیرساغین کسسین. آسلان آجیق ائله ‏ییب آیاغا قالخیب مئشه‏ یه ساری یولا دوشدو. بیر نئچه گون آسلان گؤزه گؤرونمه‏ دی آنجاق اودونچو کیشی اونو اونله ‏یه – اونله ‏یه گزیب تاپدی. آسلان اودونچو کیشی‏نی گؤرمک همین دئدی: آی کیشی یا گرک منی ووراسان، یوخسا من سنی سؤکوب داغیداجایام. نعره چکیب اونا ساری آتیلدی. کیشی ایسته ‏میردی یولداشینی وورسون. آمما اؤز جانینین قورخوسوندان بالتانی گؤتوروب اونا ساری یویوروب تپه ‏سیندن بیر ضربه ائندیردی. آسلان زینگیلده ‏یه – زینگیلده ‏یه او هندوردن قویوب گئدیب اوزاقلاشدی.
حئیوان داهی دؤرد آی گئدیب گؤزه گؤرونمه‏ دی. گئنه گونلرین بیر گونونده کیشی آسلانی آختاریب مئشه ‏نین بیر گوشه ‏سینده تاپدی. آسلان اودون‏چو کیشی‏نی گؤرن کیمی دئدی: باخ ! من یالایا – یالایا یارامی توختاتمیشام؛ آمما سنین آروادی‏نین دیل یاراسی هله ده منیم اوره ‏ییمدن گئتمه ‏ییب.

تهیه و تنظیم : الهام عبادی ( دبیر سرویس تورکی )