دسترسی ها

پایگاه خبری توران : اوستونه اکلیل قویولموش کیچیک تابوتو آلتی نفر آپاریردی.
ساکیت یای سحر ایدی، قبریستان‏لیغین چوخ حیصه‏ سینه هله گون دوشموردو. تزه‏ جه قازیلمیش مزارین تورپاغینی گونش یاواش – یاواش قیزدیریردی.
تابوت مزارا ائندیریلدی، کیشی‏لر پاپاق‏لارینی چیخارتدیلار، باش‏لارینی آشاغی دیکدیلر. سونرا اونلار قالان ایش‏لری قبیر قازانلارین عؤهده ‏سینه بوراخیب دردلشه – دردلشه گئری قاییتدیلار. مزار تورپاق‏لا دولدورولدو، آرایا ساکیت‏لیک چؤکدو. بو ساکیت‏لیک سانکی دؤرد یانی اوْوسونلانمیشدی. یالنیز خاچ‏لارین، خاطیره لؤوحه‏ لری‏نین، بیرده هئیکل‏لرین کؤلگه ‏لری یاشیل اؤرتویه بورونموش تورپاغین اوستو ایله اوزانیب گئدیردی.
مزار، قبریستان‏لیغین کاسیب‏لارا مخصوص حیصه‏ سینده ایدی. بو مزارین دا اوستونده تورپاق‏دان کیچیک بیر تپه‏ جیک یاراندی. سونرا قفیل کوله‏ ک اسدی و یومشاق تورپاغی خیردا – خیردا یولا سپه ‏له‏ دی. داها سونرا یاغیش تؤکدو و قبیرین اطرافینی تامام یویوب آپاردی. نهایت، قیش گلدی، قار یاغدی مزارین اوستونه. قیشین‏ دا عؤمرو اوزون چکمه‏ دی. یئنه باهار گلدی. مزارلارین بعضی‏لری‏نین اوستونده نوْوروز گولو تورپاغی یاریب اوزه چیخدی، چیچک‏لر آچدی، قیزیل گو‏ل‏لر دویمه باغلادی. بو مزارین دا اوستونو اوْت باسدی. ظریف چیچک‏لرله یاناشی، آلاق اوتلاری دا باش قالدیردی. ایستی یای گونلرینده ایسه جیر‏جیرامالارین جیریلتی‏سی اطرافی باشینا گؤتوردو. سونرا یئنه بیر سحر قبیرین اوستونده‏ کی اوتلار یوخا چیخدی، تکجه ظریف چیچک‏لر قالدی. بیر نئچه گون ده کئچدی مزارین باش طرفینده عادی بیر خاچ پئیدا اولدو. خاچین یولا باخمایان حیصه ‏سینده کیچیک حرف‏لرله رنگ‏سیز، یالنیز یاخین مسافه ‏دن اوخونا بیلن بیر قیز آدی حک اولوندو…
گئجه ایدی. شهرده ائولرین پنجره ‏لریندن ایشیق گلمیردی. آرتیق هامی یاتمیشدی. تکجه یوخاری محله ‏ده‏ کی بؤیوک ائوین اوتاق‏لاریندا بیر کیشی اویاق‏ ایدی. او، شام‏لاری سؤندوروب یومشاق بیر اوستول‏دا اوتوردو، گؤزلرینی یوموب آشاغی‏دا سس – سمیر گلیب – گلمه ‏دییینه خلوت‏جه قولاق آسدی. الینده آغ مامیردان اکلیل توتموشدو. بئله ‏جه چوخ اوتوردو.
باییردا شهرین کناریندا باشقا عالم وار‏ ایدی. گئجه، گئجه حشرات‏لاری اورا – بورا وورنوخوردو. او، دیوارلارداکی شکیل‏لری بیر – بیریندن آییرا بیلمه ‏دی. پنجره ‏دن باییرا باخان‏دا قارشی‏داکی بینانین پارلاق آی ایشیغینا قارق اولدوغونو گؤردو. اونون فیکیری آرتیق قبریستان‏لیغا گئدن یولدا ایدی. « قبیرین یئری کؤلگه ‏لیکدی »، – او اؤز – اؤزونه فیکیرلشدی، – « آی اونو ایشیق‏لاندیریر » . سونرا آیاغا قالخدی، ائحتیاطلا قاپی‏نی آچیب اکلیل الینده پیلله‏ کن‏لر‏له آشاغی دوشدو. ائوین دهلیزینده دایانیب بیر ده قولاق وئردی، قاپی‏نی سس‏سیز – سمیر‏سیز اؤرتوب کؤچه ‏یه چیخدی و ائولرین کؤلگه ‏لریله شهرین کنارینا طرف ایره ‏لی‏له ‏دی. شهردن قبریستان‏لیغا قده‏ ر اولان قیسا مسافه‏ نی ایسه او، آی ایشیغیندا گئتمه‏ لی اولدو. او نئجه فیکیرلشمیش‏دیسه، ائله ‏ده اولدو؛ مزار قبریستان‏لیغین حاصارلاری‏نین کؤلگه‏ سینده ایدی. اکلیلی قارا خاچ‏دان آسدی، سونرا باشینی اونون اوزه ‏رینه ایدی قبریستان‏لیغین گؤزتچی‏سی باییردا دولانیردی، آمما اونو گؤرمه‏ دی.
آیلی بیر گئجه ‏ایدی، اوت‏لارین پیچیلتی‏سی بیر – بیرینه قاریشمیشدی. او ایسه بوتون بونلاری ائشیتمیر، دویموردو؛ او، بیر داها قاییتمایاجاق ساعات‏لاری یاشاییردی، او ساعات‏لاری بیر گؤزل قیزین کناریندایدی. سولغون بیر قیز چؤهره‏ سی اونون صیفه ‏تینه طرف اییلیردی؛ اوشاق گؤزلرینه اوخشایان بیر جوت ماوی گؤز اونون گؤزلرینه باخیردی. آمما او هله ده گنج و گوزل ایدی؛ او، هله ده جذب ائدیجی ایدی. او قیز همین بو آدامی سئویر، اونون ایچین هر شئی ائدیردی. گئجه ‏لر باهارین ائرکن چاغیندا او کؤهنه ‏لیب اوزولموش پالتاردا باغا، اوغلانین یانینا گلردی. اوغلان اونو باشقا جور گؤرمه یه عادت ائله ‏میشدی. او، قیزی سئومیردی، یالنیز اونون‏لا ساده‏ جه اولاراق گؤروشور و اونون اوره‏ یینده ‏کی اولکک ائحتیراسلی آتشی چیلغین‏لیق‏لا سؤندوروردو.
اونلارین گؤروش یئرینی کوچه ‏دن آلچاق بیر چپر آییردیغیندان، یاخین‏لاردا آیاق سس‏لری آیدین ائشیدیلیردی. او، قیزین قولوندان چکیب بورادان اوزاق‏لاشماق ایسته‏ دیسه ده، قیز اونو توتوب ساخلادی.
– گؤرورلر گؤرسونلر ده، نئیله یک – دئدی.
او، قیزین قوللاری آراسیندان چیخیب چپرین یانیندان آرالاندی.
قیز ایسه یئریندن ترپنمه ‏دی، آداملار کئچیب گئده‏ نه ‏دک و آددیم سس‏لری کسیله ‏نه‏ دک بئله‏ جه دایاندی. اوغلانین یئنی‏دن یاخین‏لاشماغینی گؤرمه ‏دی، آمما بونو حیس ائدنده باشینی داها آشاغی چکدی و پیچیلتی‏یلا دئدی:
– بیلیرم، اوتانیرسان.
او، جاواب وئرمه دی، نیمکت‏ده ایلشدی سونرا قیزی آد چکیب یانیندا اوتوردو. قیز اعتیراض ائله‏ مه ‏دی، قورخوردو کی، بایاق‏کی حرکت‏لریله بیردن اونون خطرینه دیمیش اولا. سانکی او جاوان بیر قیز دئییل، اینجه، ظریف بدن‏لی بیر سو پری‏سی ایدی. او، قیزی جیرناتماق اوچون دئدی کی، او جادوگردیر.
سویوق کولک گلیردی؛ او، اؤز پالتوسونو قیزا وئردی. قیز ایسه باشینی قالدیریب خومار گؤزلریله خوش‏بخت حالدا اونو سوزدو:
– من اوشویوب – ائله ‏میرم! – دئدی. قیزین ایختیاری سانکی اؤزونده دئییلدی و ایندن بئله اؤزونو اونونکو حئساب ائدیردی. او ایسه قیزی قورویوردو. اونا گؤره یوخ کی، قیزا یازیغی گلیردی و یاخود سئومه‏ دن اونو اؤزونونکو آدلاندیرماغی گوناه حئساب ائدیردی، یوخ، اونا ائله گلیردی کی، قیزا تام صاحیب اولماق اونا میسر اولمایاجاق، کیم ایسه قیزی اونون الیندن آلاجاق. او بیلمیردی کی بو اؤلوم اولاجاق.
او آیاغا قالخیب گئتمک ایسته ‏دی.
– سنه سویوق اولار، – دئدی.
آمما قیز اوندان ال چکه بولموردو. – هئچ نه اولماز عزیزیم، – دئدی.
او اوغلانین قاباغیندا دوروب، اؤزونو اونوتموش حالدا ماتدیم – ماتدیم اونا باخدی.
بو سویوق گئجه ‏دن بیر هفته سونرا قیز یورغان – دؤشک‏ دن قالخا بیلمه ‏دی؛ ایکی آیدان سونرا ایسه حیات‏لا ویدالاشدی. اوغلان اونو بیر داها گؤرمه ‏دی؛ آمما قیزین اؤلوموندن سونرا اونون حیات عشقی ده اؤلدو؛ او، اوزون ایللردیر کی، قیزین جانلی صورتینی اوره ‏یینده گزدیریر، سانکی او، اؤلن قیزی تزه ‏دن سئومه‏ یه باشلامیشدی.
( آلمان حیکایه ‏سی ). تئودور ایشتوْرم

تهیه و تنظیم : الهام عبادی ( دبیر سرویس تورکی)