دسترسی ها

پایگاه خبری توران : آشیق حوسئین گورولتولو آلقیش‏لار ایچینده چایخانایا وارید اولدو. او – ایله‏ شین – دئیه، آغ ساققال‏لارا باش ایدی. سونرا آشیق خئیروللایا یاخین‏لاشیب – خوش گلدین – دئییب اونا گوله – گوله بیر گؤز ده ووردو. سازی‏نین زیل – بمینی کؤکله‏ ییب حاضیرلاشدی. ایکی آشیق چایخانانین ایکی باشیندا اوز – اوزه دایاندیلار.
آشیق حوسئین سازینا بیر تک میضراب ووراندا بوتون سس‏لر کسیلدی، داها کیمسه‏ دن بیر جینقیر دا چیخماییردی.
آشیق حوسئین اوزونو آشیق خئیروللایا توتوب – قوناق قارداش! بویور باشلا! – دئیه‏ ن‏ده، خئیروللا یوخاری باش‏دا اوتورموش آشیق‏لارا باش اییب – اوستادلارین ایجازه‏ سی‏له – دئیه، میضرابی سیم‏لره توخوندوردو.
خئیروللانین ال‏لری اسیر، اوره ‏یی چیرپینیردی. آشیق حوسئینین مئهریبان باخیشی اونا توختاق وئریردی. خئیروللا دیوانی هاواسینی چالا – چالا سؤزه باشلادی :
مندن سالام اولسون حوسئین جاوانا،
یاییلیب شؤهرتی میله، موغانا،
عزیز اوستاد! نئچه سورغوم وار سانا،
جاواب بویور، ائل سسینی دینله‏ سین.
***
او نه ‏دیر کی، بیلینمزدیر یاراسی؟
او نه‏ دیر‏کی، هئچ تاپیلماز چاراسی؟
نه‏ قده ‏ردیر یئرله گؤیون آراسی؟
لزگی احمد بو دفتری یازار هئی؟..
خئیروللانین ملاحت‏لی سسینی دینله‏ ییب، باخیش‏لار گئت‏ به‏ گئت اونا مئهریبان‏لاشدی.او، سؤزونو قورتاران کیمی ائحتیرام‏لا آشیق حؤسئینه باش اییب، چکیلیب کناردا دایاندی. آشیق حوسئین سازینی باغرینا باسیب، میضرابی‏نین ریتمی ایله چایخانانین مئیدانینی ووقارلا دولانماغا باشلادی.او گاهدان سازینی چالا – چالا چایخانانین آستاناسینا چیخاندا، باییرا توپلانمیش پرستیش‏کارلاری‏نین مئریبان باخیش‏لاریلا آلقیشلانیردی. نهایت گلیب آشاغی باشدا آشیق‏لارین اؤنونده دایاندی. اونون هر میضرابی‏لا بوتون باش‏لار ساغا – سولا هرلنیردی.
بیردن – بیره، ایلدیریم چاخان کیمی چایخانانین فضاسی جینگیلده‏ دی. بو آن تاخچالارا دوزولموش ایستیکان‏لار لرزه‏ یه دوشوب بیر – بیرینه توخوندولار. اونون سسی گؤی مچیدین کونبزیندن آشیب، تبریزین خیاوان‏لارینا یاییلدی…
او اوره‏ ک‏دیر بیلینمزدیر یاراسی،
او اؤلوم‏دور هئچ تاپیلماز چاراسی،
دوخسان مین ایل یئرله گؤیون آراسی،
خسته قاسیم بو دفتری پوزار هئی…
آشیق حوسئین سؤزونو قورتاران کیمی گوموش پول چایخانانین اورتاسینا قویولموش سینی‏یه یاغیش کیمی یاغماغا باشلادی. بو آن شمیل بیر اووج اوزه‏ ر‏لییی اوچ دؤنه آشیق حوسئینین باشینا دولاندیریب، توولامانین اودونا آتدی. فیت سسی‏له گورولتولو آلقیش‏لار چایخانانی تیتره‏ دیردی. سس‏لر کسیلمک بیلمیردی، نهایت آشیق حوسئینین الی‏نین ایشاره‏ سی‏له سسلر کسیلدی. خئیروللا ایکینجی و اوچونجو قیفیل‏بندینی‏ده اوخویوب، آشیق حوسئین‏دن جاوابینی آلدی. سونرا نؤوبت حوسئین جاوانا چاتدی…
دئییشمه اوچ ساعات‏دان آرتیق داوام ائتدی، هر ایکی آشیق بیر – بیری‏نین سورغو – سوآلینا لایقینجه جاواب وئردیلر. سؤز گلیب سون مقامینا چاتمیشدی. قهوه‏ چی شمیل یاواش – یاواش تدارو‏ک فیکرینده ‏‏ایدی…
هر زامان آشیق حوسئینین دئییشمه‏ سیندن سونرا، شمیل ارز حئسابینا بوتون موشتری‏لره شیرین چای پایلاردی. ایندی ده ایستیکان‏لاری یویوب، الینده قورولاییب، سینی‏یه دوزوردو. شمیل ایشله‏ دییی حالدا دا، بیر آن بئله گؤزونو آشیق حوسئین‏دن آییرا بیلمیردی. خئیروللا سون قیفیل‏بندینی بئله باشلادی :
بیر حیکمت گؤرموشم خیالیم چاشیب،
هوش باشیمدان گئدیب، دیلیم دولاشیب
شاهین قوللوغوندا بیر قول ایله‏ شیب
بدن بیردیر، ال – آیاغی یئددی‏دیر؟
خئیروللا سؤزونو قورتاران کیمی یئنه باش اییب کنارا چکیلدی. آشیق حوسئین سازینی چالا – چالا مئیدانی بیر دؤوره گزیب، گلیب دایاندی. او، قیفیل‏بنده جاواب وئرمه‏ ییب، بیر آزدان دوباره مئیدانی دولانماغا باشلادی. بو ایش قئیری – عادی بیر حرکت اولسادا، هئچ کسین دیققتینی اؤزونه جلب ائتمه ‏دی. اوچونجو دؤورو ده قورتاریب سؤزه باشلامادی. یاواش – یاواش باخیش‏لاردا بیر نییاران‏لیق یاراندی. بیردن قهوه‏ چی‏نین الیندن بیر ایستیکان یئره دوشوب، چیلیک – چیلیک اولدو…
خئیروللا باشینی آشاغی سالیب، خیالا دالمیشدی:
« بلکه قیفیل‏بندین جاوابی قاغامین یادیندان چیخیب؟! یوخ! بو اصلن اولان ایش دئییل، او یقین بیله – بیله جاواب وئرمک‏دن بویون قاچیریر » دئدی.
خئیروللانین گؤزلری دولدو، اوره‏ یی قوش کیمی چیرپینماغا باشلادی.
بیر نئچه نفر آیاغا قالخیب، سیغار یاندیریب، چایخانادان باییرا چیخدیلار. بیردن چایخانانین قاباغینداکی ایزدیحام دنیز کیمی چالخالانیب، بیر الی آغاج‏لی جاوان ائشییه توللاندی. او، سؤیوش وئره – وئره ایچه‏ ری گیریب، خئیروللایا طرف یویوردو. آشیق حوسئین جلد اونو قوجاق‏لاییب، آغاجینی الیندن آلدی. جاوان اوغلان جاوان اوغلان باشینی حوسئینین سینه‏ سینه سؤیکه‏ ییب، هؤنکور – هؤنکور آغلاماغا باشلادی. هامی چاخناشدی. عابباس بالابانچی تئز خئیروللانی آرادان چیخارتدی.بیردن آشیق حوسئین اوجا سسله سؤزه باشلادی:
– قارداشلار! قارداشلار! بیر منه ایجازه وئرین. منیم عزیزلریم! بورا صنت مئیدانی‏دیر، سؤزه سؤزله جاواب وئرمک لازیم‏دیر. بیر دایانین! خئیروللا منیم اؤز بالام کیمی‏دیر، بوندان علاوه، او منیم نئچه ایل شاگیردیم اولوب. من قاراداغین بئله بیر صنت‏کار یئتیردییینه فخر ائدیرم.
بیر آن های – کوی سایخاشلاندی.
آشیق حوسئین – منیم حئسابیما هامی‏یا شیرین چای وئرین – علاوه ائتدی. قهوه‏ چی شمیل دیزلرینی قوجاق‏لاییب، باشینی دیوارا سؤیکه‏ میشدی…
***
بوتون دوکان – بازار باغلانمیشدی. گئجه‏ دن بیر نئچه ساعات کئچسه‏ ده، هله ده حتم کاروان‏ساراسیندا بیرجه نفر بئله یاتمامیشدی.
بوتون موسافیرلر خئیروللانین اوتاغینا توپلاشیب، اونون صنت‏کارلیغیندان، اونون شؤهرتی‏نین بوتون تبریزه یاییلماسیندان سؤز آچمیشدیلار…
خئیروللا ایسه چایخانادان چیخدیقدان بری داغینیق فیکیرلرله سیغاری سیغارلا یاندیرمیشدی.
بیردن کاروانسارانین قاپیسی تاققا – تاق چالیندی. بیر آندان آشیق حوسئین الینده بیر دولو دسمال قاپینی آچیب ایچری گیرنده، هامی بیرلیکده آیاغا قالخدیلار. خئیروللا آشیق حوسئینین الینی اؤپمک ایسته‏ یه‏ نده حوسئین اونا مانع اولدو.
ایکی صنت‏کار بیر – بیرینی باغرینا باسدیلار… .

تهیه و تنظیم: الهام عبادی ( دبیر سرویس تورکی )