دسترسی ها

( پایگاه خبری توران ) – من آدمم . هه ، همین او آللاهین یاراتدیغی ایلک اینسانام . آدم . منیم خانیمیم دا ائله همین حووادیر ، ایلک قادین . خئیر دلی‏- زاد دئییلم ، آغلیم باشیمدادیر –نه دئدیییمی یاخشی بیلیرم. یعنی من اصلینده آنادان دوغولدوغومدان دوققوز آی اول آللاهیمین یاراتدیغی آدم ‏ایدیم . منیم خانیمیم دا ، فاطمانیسانی دئییرم ، حووا ایدی. آللاه بیزه آغاج‏دا گؤزل مئیوه گؤستردی . دئدی : « بو مئیو‏ه ‏نی یئمه‏ یین » . ایلاهی مئیوه نه گؤزل اولارمیش . آللاه اونو قودرتیندن یاراتمیشدیر . آج دئییلدیک، آمما مئیوه بیزی اؤزونه چکیردی . اونون عطیری ، گؤزللییی بیزه بس ‏ایدی . آمما یوخ، تاماح بیزه گوج گلیردی . واللاه –بیللاه آج دئییلدیک . بیر یاندان دا حووا منی دومسوکله ‏ییردی ، فاطمانیسانی دئییرم ائ :

‏ – گل بیر دادینا باخاق . نه اولار ؟ باخاق دا …

‏- دئییب کی اونا ده ‏یمه ‏یین !

‏- اولماز ، اولماز ، نییه ! کیمه ساخلاییب اونو؟ یاراتدیغی سنسن، منم . بس کیم یئیه‏ جک اونو . گؤرن ده یوخدو، دادینا باخاق…

‏- یوخ ، یوخ

‏- یوخ ، دئ کی قورخورام !

‏- کیم دن قورخورام آخی ؟

‏ – نه بیلیم . اولماز دئیه ‏ندن ! ائله بیلیرسن ؛ ایشینی –گوجونو بوراخیب ، ائله بیزه تاماشا ائدیر . یقین بیزدن سونراکی‏لارا ساخلاییب اونو . یقین ایندی تزه آدم ، حووا دوزه ‏لدیر . بیز هئچ یادینا دا دوشموروک . گل دادینا بیر باخاق .

آخیری کی، حووا منی یولدان چیخارتدی . بیزیم خانیم فاطمانیسانی دئییرم ائی . خولاصه مئیوه ‏نی اوزدوم، یئدیک، باشلادی عاییب‏لی یئرلریمیز گؤرونمه‏ یه. سن دئمه بیز گؤزه گؤرونمه ‏ز یارانمیشیق . باشلادیق گؤرونمه‏ یه . یارپاقلار آراسیندا گیزله‏ ندیک . سن دئمه او مئیوه، محببت ایمیش. صاف و بؤیوک محببت . بیز اونون عطری‏له ، گؤزللییی‏له ابدی خوشبخت یاشایا بیله ‏ردیک . او بوتون یارانمیشلارا دا بس ائده بیلردی . آمما یوخ حووایا اونون عطری، گؤزللییی بس ائله ‏مه‏ دی. اونو اوزوب یئمه ‏ک، چئینه ‏مک، اوتماق، قارنیندا اریتمک ایسته ‏دی . او محببتی بیز، شهوت حیسسی ائله ‏دیک . آللاه بیزی قوودو، یئر اوزونه قوودو . بیزیم پاک‏لیغیمیزی قویدو حووانین قارنینا . یئر اوزونه عادت ائله ‏یک دئیه، حووانین بطنین‏ده دوققوز آی اویغونلاشما دؤورو کئچدیک. نهایت جزا یئریمیز اولان دونیایا گلدیک. دونیایا گلن آندان، هله هئچ گؤزوموزو آچمامیشدان بو دونیانین هاواسیندان ، قوخوسوندان آغلادیق . البته کی آغلامالی گونوموزودو. آغلادیق . اطرافداکی‏لار نییه گولوردو، داها بیزه فرقی یوخویدو. قوْی گولسونلر. آللاها جانیم قوربان، من تک گلمیشدیم دونیایا. حووا یانیمدا یوخویدو. دئدیم یاخشی جانیمی قورتاردیم اوندان. اونا هله بودا آزدیر. گول کیمی شفاف و چکی‏سیزایدیم.

ایندی یئییرم، یئدیکجه آغیرلاشیرام. عمللی باشلی یوکم. منی قوجاقلارینا آلیب گزدیریرلر، بدنیمی گزدیرمه ‏یه ده گوجوم چاتمیر. نهایت بیر ته‏ هر سوروندوم، ایمکله‏ دیم، زورلا آیاغا قالخیب یئریدیم. بدن دئییل کی آغیر بیر یوکدور. آللاه یوکله ‏ییب منه، سورویورم ،گزدیریرم. اونو یئدیرتمک، یاشاتماق اوچون دری‏دن- قابیقدان چیخیرام. قویوب قاچاردیم، آمما آللاهیمین وئردییی جزادیر، گرک چکم. سونرا گوجوم چاتمایاندا، جزام سونا چاتاندا بدن آدلانان بو یوکون ایچیندن سیریلیب چیخاجاغام، آزاد اولاجاغام . کیم بیلیر بو هله هاچان اولاجاق . گونلریمین بیر گونو گؤردوم حووا یولون اورتاسیندا دوروب منه باخیر، گولومسه ‏ییر. فاطمانیسانی دئییرم ائی… نه ایشه دوشدوک. باشیمی گؤتوروب قاچاردیم، آمما فاطمانیسانین صیفتینده، گؤزلرینده، نفسینده، گولوشونده، او مئیوه ‏نین عطری، گؤزللییی پارلاییردی. منی اؤزونه چکیردی.

آللاهیم دئیه‏ سن سنین منه وئردییین جزا ائله حووا ایمیش، استغفرواللاه، فاطمانیسانی دئییرم ائی…قاچماق اولمور کی بو گؤزل بلادان، بوجور شیرین درددن نئجه قاچاسان؟ بیرده لاپ قاچدین، هارا قاچاجاقسان؟ جزانی چکیب آللاهین حوضورونا قاییدینجا، سن هله بورداسان. آللاهدان یالنیز آللاها دوغرو قاچماق اولار. یئنه حووا منی یولدان چیخارتدی . یئنه او مئیوه‏ نی یئدیک. اؤز جانیمی سورومکدن گیلئیله ‏نیردیم، ایندی فاطمانیسانی دا دالیما آلمیشدیم. بیر واخت حیسس ائله ‏دیم کی فاطمانیسا اؤزوندن ده آغیردیر. قارنینا الیمی قویدوم. آللاه آللاه منه اوخشایان بیر گوناهکاری دا یارادان جزالاندیریب، یئر اوزونه گؤنده ‏ریردی.

‏- فاطما نیسا، قوناغی سنه تاپشیریرام، ائحتیاطلی اول. بو ویران قویدوغوموز دونیا ایله ائله اونو، من بلکه بو یوکه دؤزه بیلمه ‏دیم، آرادان چیخدیم.

‏- منیم گوناهیم نه ‏دیر؟ ‏- دئدی حووا.

‏- سنین گوناهین منی یولدان چیخاریب گول کیمی جننتدن قوودورماقدیر. آی فاطمانیسا…

‏- اونون هاراسی گول کیمی‏ ایدی؟! آیاغین یئره چاتمیردی. باشین گؤیه. چکین یوخ، رنگین یوخ‏ ایدی. اونو اولماز، بونو اولار. حاییف دئییل بو عذابلار، حاییف دئییل اولمازی ائله‏ مک. او محببت آدلی مئیوه – ‏نی بیر دیش دمیندن آلدیغیم حظ ، مین ایللیک عطرینه ده ‏یه ‏ر. او بیرآن خوشبختلییین ان اوزون زامانی‏دیر.

‏- حظ آلدین؟ دوققوز آی قارنیندا گزدیر، سونرا قوجاغیندا، سونرا بوینوندا … سونرا…

‏- گزدیره ‏رم. بونو آللاه وئریب، شیرین‏دیر، عزیزدیر. آللاه ائله عاقیل‏دیر، ائله بؤیوک‏دور، جزاسی دا شیرین‏دیر، عذابلاری دا دادلی‏دیر.

بونو فاطمانیسا دئییب ائی… دئیه ‏سن. یا رببیم کئچ گوناهیمدان، دئیه ‏سن من اونا گؤره یاشاییرام کی جزامی چکیب قورتارمامیشام. هله باشا دوشمه‏ میشم. هله دئدیکلرینی قاورایا بیلمه‏ میشم. بونلاری حووا مندن تئز آنلاییب. فاطمانیسانی دئییرم ائی… .

تهیه و تنظیم : الهام عبادی ( دبیر سرویس تورکی )